Hyb Trafnidiaeth Porth Wrecsam

Mae Trafnidiaeth Cymru (TrC) yn bwriadu trawsnewid yr ardal o amgylch gorsaf Wrecsam Cyffredinol yn canolfan drafnidiaeth leol ac mae aelodau o’r cyhoedd yn cael eu gwahodd i rannu eu safbwyntiau.

Mae Trafnidiaeth Cymru (TrC) yn gweithio ochr yn ochr â Chyngor Bwrdeistref Sirol Wrecsam, Llywodraeth Cymru, Prifysgol Wrecsam, a phartneriaid ehangach, i gyflwyno cynllun adfywio mawr yn yr ardal o amgylch gorsaf reilffordd Wrecsam Cyffredinol, y cyfeirir ato fel ‘Porth Wrecsam’. Mae prosiect Porth Wrecsam yn cynnwys ailddatblygu stand Kop yn STōK Cae Ras, yn ogystal â’r posibiliadau adfywio sy’n gysylltiedig â gorsaf reilffordd Wrecsam Cyffredinol.

Fel rhan o’r prosiect hwn, mae TrC wedi nodi cyfle i ddatblygu canolfan drafnidiaeth newydd o flaen yr orsaf. Bydd hyn yn golygu bod modd trawsnewid yr ardal gyda’r nod o gyflawni’r pethau canlynol:

• Gwella cyfleusterau cyfnewid rhwng dulliau teithio (er enghraifft, os ydynt yn newid rhwng rheilffyrdd a bysiau ymlaen).
• Gwell cysylltedd cerdded a beicio yn ôl ac ymlaen i’r orsaf reilffordd a chyrchfannau cyfagos fel Canol y Ddinas, STōK Cae Ras a Phrifysgol Wrecsam.
• Gwell profiad i ddefnyddwyr yn yr orsaf drenau.
• Gwella amgylchedd yr orsaf a’r croeso i ddinas Wrecsam.

Mae TrC wedi comisiynu WSP i ddatblygu astudiaeth cam dau WelTAG (achos busnes amlinellol) i fwrw ymlaen â chynigion ar gyfer canolfan drafnidiaeth Porth Wrecsam. Pwrpas yr astudiaeth yw datblygu ymhellach opsiynau posibl ar gyfer y canolfan drafnidiaeth yng nghyd-destun a chefnogi uchelgeisiau adfywio ehangach cynllun Porth Wrecsam.

Pam ydyn ni’n ymgysylltu â’r cyhoedd?

Nod yr astudiaeth yw deall yn fanylach y problemau a’r heriau y mae aelodau o’r cyhoedd a busnesau yn eu hwynebu wrth deithio yn ôl ac ymlaen ac wrth ddefnyddio gorsaf reilffordd Wrecsam Cyffredinol. Mae hyn er mwyn sicrhau ein bod yn cofnodi amrywiaeth eang o faterion a chyfleoedd posibl yn yr ardal, gan roi’r wybodaeth ddiweddaraf am gynigion canolfan drafnidiaeth Porth Wrecsam ar yr un pryd.

Dweud eich dweud ar-lein

Byddem yn ddiolchgar pe gallech dreulio ychydig o amser yn ymateb i’n harolwg isod. Rydyn ni eisiau gwneud yn siŵr bod y cynigion hyn yn diwallu anghenion ein cwsmeriaid a’r cymunedau rydyn ni’n eu gwasanaethu yn y ffordd orau. Dyna pam rydyn ni eisiau clywed gennych chi.

Dweud eich dweud yn bersonol

Os byddai’n well gennych siarad â ni ac adborth yn bersonol, bydd aelodau o dîm y prosiect ar gael yn y lleoliadau canlynol ar y dyddiadau a amlinellir:

• Tŷ Pawb (Tŷ Pawb, Stryd y Farchnad, Wrecsam LL13 8BB) ar 14 Tachwedd rhwng 14:00 a 18:00.
• Prifysgol Wrecsam B10 (Ffordd yr Wyddgrug, Wrecsam, Cymru, LL11 2AW) ar 15 Tachwedd rhwng 09:00 a 14:00.
• Gorsaf drenau Wrecsam Cyffredinol (Ffordd Dynesu’r Orsaf, Wrecsam, LL11 2AA) ar 29 Tachwedd rhwng 09:00 a 19:00.

Bydd ffurflenni adborth papur yn y Gymraeg a Saesneg ar gael yn y sesiynau galw heibio, neu gellir casglu'r rhain yn ystod y cyfnod ymgysylltu o Swyddfa docynnau gorsaf Wrecsam Cyffredinol,Tŷ Pawb (Stryd y Farchnad, Wrecsam LL13 8BB) a Llyfrgell Wrecsam (Ffordd Rhosddu Wrecsam LL11 1AU), o 14 Tachwedd.

Cysylltu â thîm y prosiect

Os oes gennych unrhyw gwestiynau sy’n ymwneud â’r prosiect, rydyn ni wedi darparu rhestr o gwestiynau cyffredin i’r dde. Os nad yw eich cwestiwn wedi’i gynnwys ymysg y rhain, mae croeso i chi gysylltu â thîm y prosiect drwy:

• E-bost: PorthWrexhamGateway@wsp.com
• Post (At sylw: Canolfan Drafnidiaeth Porth Wrecsam): Trafnidiaeth Cymru, Tŷ Ellice (Uned H), Pentref Busnes Wrecsam, Ellice Way, Wrecsam, LL13 7YL.

Beth fydd yn digwydd ar ôl i’r cyfnod ymgysylltu ddod i ben?

Bydd yr holl awgrymiadau a ddaw i law yn cael eu hystyried wrth ddatblygu opsiynau dylunio ar gyfer y ganolfan drafnidiaeth. Bydd opsiynau ar y rhestr fer yn cael eu hystyried yn erbyn eu cyfraniad tuag at gyflawni amcanion y prosiect yn ogystal ag uchelgeisiau polisi lleol, rhanbarthol a chenedlaethol. Byddwn hefyd yn ystyried eu gallu tebygol i gyflawni – yn ogystal â manteision a/neu effeithiau ar ffactorau cymdeithasol, economaidd, amgylcheddol a diwylliannol.

Os bydd yr opsiynau hyn ar y rhestr fer yn cael eu derbyn ar gyfer cynnydd, byddwn wedyn yn symud ymlaen (yn amodol ar gyllid a chytundeb partneriaid ar yr opsiynau) i gam 3 WelTAG. Bryd hynny, byddem yn gofyn am adborth penodol ar y dyluniadau manylach.