Porth Wrecsam – Parth Datblygu y Dwyrain

Mae Cyngor Bwrdeistref Sirol Wrecsam wedi bod yn gweithio mewn partneriaeth â Thrafnidiaeth Cymru, Prifysgol Wrecsam a Llywodraeth Cymru, drwy Bartneriaeth Porth Wrecsam, i ddatblygu cynigion ar gyfer cynllun adfywio defnydd cymysg mawr, ar hyd coridor Ffordd yr Wyddgrug, yn yr ardal o amgylch Gorsaf Wrecsam Cyffredinol. Mae'r Cynllun yn ceisio cyflawni newid trawsnewidiol yn yr ardal er budd trigolion a busnesau Wrecsam a'r isranbarth ehangach drwy ddarparu datblygiad o ansawdd uchel, gwell cysylltedd trafnidiaeth gynaliadwy a gwelliannau sylweddol i'r amgylchedd lleol.

Cynigion Porth Wrecsam

Oherwydd maint Prosiect Porth Wrecsam a'r buddsoddiad sydd ei angen, mae'r cynllun wedi'i rannu'n barth y dwyrain a pharth y gorllewin.

Mae'r cynigion ar gyfer parth y gorllewin yn cynnwys cyflwyno Ardal Sefyll newydd yn Stadiwm Cae Ras Stok ynghyd â gwesty 4 seren o bosibl. Yn ddiweddar, cafwyd caniatâd cynllunio ar gyfer yr Ardal Sefyll newydd gyda'r datblygiad i ddechrau yn haf 25.

Mae'r cynigion ar gyfer Parth y Dwyrain yn cynnwys cyflawni:

Canolfan drafnidiaeth newydd o flaen Gorsaf Wrecsam Cyffredinol, sy'n sbardun allweddol i'r cynllun, gan ymgorffori teithio cynaliadwy wrth wraidd y cynigion drwy ddarparu gwell cyfleusterau cyfnewid rhwng trenau a bysus gyda gwell cysylltedd cerdded, olwynio a beicio gwell rhwng yr orsaf a chanol y ddinas a chyrchfannau cyfagos eraill.

• Datblygiad masnachol arwyddocaol newydd
• Sgwâr cyhoeddus a chynllun tirlunio newydd sy'n cynnig lleoliad ehangach ar gyfer yr orsaf, datblygiad masnachol newydd a chroeso i Ddinas Wrecsam
• Gwell seilwaith priffyrdd a mynediad i'r safle a
• Potensial ar gyfer bragdy newydd gydag ystafell dap, bwyty ac amgueddfa fel canolfan ymwelwyr newydd sbon.

Mae cynllun sy'n ymgorffori'r holl elfennau allweddol hyn wedi'i ddatblygu bellach.

Ble rydyn ni arni a pham rydyn ni'n ymgysylltu â'r cyhoedd?

Bydd Cyngor Wrecsam yn cyflwyno cais cynllunio amlinellol ar gyfer cynigion Parth y Dwyrain Porth Wrecsam ond hoffem rannu'r rhain â chi ymlaen llaw i glywed eich barn ar yr hyn sy'n cael ei gynnig. Bydd yr holl sylwadau a dderbynnir yn cael eu hystyried a lle bo’n bosibl ac yn ymarferol byddant yn cael eu defnyddio i lywio'r datblygiad arfaethedig.

Byddem yn ddiolchgar pe gallech dreulio ychydig o amser yn ymateb i'n harolwg.

Mae'r cyfnod ymgynghori ar agor nawr ac yn parhau tan 12 Mai 2025.

Dweud eich dweud wyneb yn wyneb

Os byddai'n well gennych siarad â ni a rhoi adborth wyneb yn wyneb, bydd aelodau o dîm Partneriaeth Porth Wrecsam ar gael yn y lleoliadau canlynol ar y dyddiadau a amlinellir isod:

• Gorsaf Wrecsam Cyffredinol (Station Approach, Wrecsam LL11 2AA) ar 1 Ebrill 10am-4pm.
• Tŷ Pawb (Tŷ Pawb, Stryt y Farchnad, Wrecsam LL13 8BB) ar 9 Ebrill 10am-4pm.

Bydd ffurflenni adborth papur yn Gymraeg a Saesneg ar gael yn y digwyddiadau galw heibio, neu gellir eu casglu yn ystod y cyfnod ymgysylltu o swyddfa docynnau Gorsaf Wrecsam Cyffredinol a Llyfrgell Wrecsam (Ffordd Rhosddu, Wrecsam LL11 1AU) 2pm ddydd Mercher 2 Ebrill.

Os oes gennych unrhyw gwestiynau neu sylwadau, cysylltwch â'r tîm: e-bost: Patrick.stone@spawforths.com. Post: (At Sylw: Ymgynghoriad Porth Wrecsam, Cyngor Bwrdeistref Sirol Wrecsam, Stryd y Lampint, Wrecsam LL11 1AR).

Beth fydd yn digwydd ar ôl i'r cyfnod ymgysylltu gau?

Mae Partneriaeth Porth Wrecsam yn bwriadu cyflwyno rhag-gais ac yna cais cynllunio amlinellol. Bydd yr holl adborth o'r ymgynghoriad cyhoeddus yn cael ei ystyried a, lle bo'n ymarferol, yn cael ei ddefnyddio i lywio'r cynigion a gyflwynir.