Cynigion i wella gorsaf Caergybi

Diweddariad ar y Cyfnod Ymgynghori Opsiynau

Daeth y cyfnod ymgynghori opsiynau ar gyfer Cam 2 WelTAG yng ngorsaf Caergybi i ben ddydd Iau 22 Rhagfyr 2022. I siarad ag aelod o dîm prosiect Trafnidiaeth Cymru, cysylltwch â ymgysylltu@trc.cymru

I gysylltu â Trafnidiaeth Cymru ynghylch unrhyw beth arall, ewch i’r dudalen hon am fanylion cyswllt: Cymorth a chysylltu | TfW (trc.cymru)

Cefndir cynllun gorsaf Caergybi

Mae cynllun gorsaf Caergybi yn cael ei ddatblygu gan ddefnyddio WelTAG (arweiniad ar arfarnu trafnidiaeth Llywodraeth Cymru). Ar hyn o bryd, mae cynllun gorsaf Caergybi yn mynd drwy Gam 2 WelTAG (Achos Busnes Amlinellol). Mae WelTAG 2017 yn nodi fframwaith eang ar gyfer adnabod, arfarnu a gwerthuso atebion i fynd i’r afael â materion sy’n ymwneud â thrafnidiaeth. Mae’n helpu i ganfod y cynllun mwyaf buddiol ac yn caniatáu cymharu cynlluniau ar sail tebyg am debyg. 

Mae proses WelTAG yn cynnwys pum cam sydd â'r bwriad o gynnwys cylch bywyd cynllun trafnidiaeth arfaethedig, o’r cysyniad i’r gwerthusiad ar ôl gweithredu. 

Dyma bum cam WelTAG:

• Cam Un – Achos Amlinellol Strategol
• Cam Dau – Achos Busnes Amlinellol
• Cam Tri – Achos Busnes Llawn
• Cam Pedwar – Gweithredu
• Cam Pump – Ar ôl Gweithredu (Monitro a Gwerthuso)

Cafodd diweddariad i ganllawiau WelTAG (i adlewyrchu Llwybr Newydd, strategaeth drafnidiaeth newydd Cymru 2021) ei gyhoeddi gan Lywodraeth Cymru ym mis Awst 2022 ac mae’n destun ymgynghoriad ar hyn o bryd.

Ymgynghoriad Opsiynau: 10 Tachwedd i 22 Rhagfyr 2022 (eisioes wedi cau)

Cafodd cyfnod yr ymgynghoriad ei rhedeg o Dydd Iau 10 Tachwedd tan hanner nos, nos Iau 22 Rhagfyr 2022.

Roedd rhanddeiliad a’r cymuned lleol yn gallu roi eu barn drwy:

• Llenwi ffurflen adborth ar-lein, oedd ar gael yma a’r linc isod 
• Llenwi ffurflen adborth bapur. Roedd rhain ar gael yng ngorsaf Caergybi (Ffordd Llundain, Caergybi L65 2NE) ac yn Llyfrgell Caergybi (Neuadd y Farchnad, Stryd Stanley, Caergybi, LL65 1HH)

Opsiynau cynllun

Mae’r astudiaeth hon yn defnyddio dull cyfannol hirdymor i wneud y gwelliannau sydd eu hangen i sefydlu gorsaf Caergybi fel canolfan drafnidiaeth. Er mwyn gwneud hyn, canolbwyntiwyd ar nifer o feysydd gwella cyffredinol, sy’n cael eu crynhoi isod ynghyd â rhai o’r opsiynau sydd wedi cael eu hystyried:

Canfod y ffordd

• Gwella’r arwyddion yn yr orsaf drenau
• Gwella’r arwyddion rhwng yr orsaf drenau a Chanol Tref Caergybi
• Gwella’r ddarpariaeth ac ansawdd yr arwyddion sy’n croesawu ymwelwyr ac sy’n gwneud i’r orsaf deimlo’n groesawgar a deniadol (fel porth i Gymru)

 Hygyrchedd 

• Gwneud Black Bridge ar gyfer cerddwyr a beicwyr yn unig
• Gwneud Black Bridge yn un lôn / ar gyfer traffig unffordd 
• Tynnu’r bont droed bresennol (rhwng platfform 1 a Ffordd Fictoria) 
• Gosod pont droed newydd yn lle’r bont droed bresennol (rhwng platfform 1 a Ffordd Fictoria)
• Creu cyswllt i gerddwyr o Bont y Porth Celtaidd i Ffordd Fictoria er mwyn gwella hygyrchedd i lefel is Ffordd Fictoria
• Gwella mynediad i orsaf Caergybi gan sicrhau ei bod yn hygyrch i bawb – yn enwedig y rheini sydd â symudedd cyfyngedig, sydd mewn cadeiriau olwyn neu sydd â phramiau

 Teithio llesol

• Cyflwyno lonydd beiciau a llwybrau troed penodol ar Black Bridge a’r mynedfeydd i’r orsaf
• Sicrhau bod y llwybrau teithio llesol presennol i’r orsaf ac i ardal Caergybi yn ehangach yn cael eu hintegreiddio â’r cynlluniau yn yr orsaf
• Cynyddu’r seilwaith teithio llesol drwy ddarparu cyfleusterau storio beiciau yn yr orsaf
• Darparu beiciau i'w rhentu yn yr orsaf
• Darparu llwybrau troed a llwybrau beiciau newydd yn yr orsaf
• Addasu cyfleusterau parcio i’r dwyrain o’r orsaf ar gyffordd yr A55/Black Bridge ar gyfer mynediad i gerddwyr a beiciau
• Cael gwared â’r arwyddion anghyson yn yr orsaf a allai atal beicwyr

 Yr amgylchedd ffisegol

• Aildrefnu’r ardal i’r dwyrain o’r orsaf i greu lle ar gyfer canolfan drafnidiaeth
• Ail-lenwi rhan o’r harbwr ac ailddatblygu’r tir i wella amgylchedd yr orsaf
• Ailwampio a thrawsnewid mannau o’r orsaf sy’n segur ar hyn o bryd yn gyfleoedd manwerthu a chymunedol

 Y tu mewn i’r orsaf

• Ailgynllunio Platfform 1 i wella’r apêl, gan fanteisio i’r eithaf ar yr olygfa o’r harbwr mewnol
• Cael gwared â’r adeiladau ar blatfform 1, ond cael canopi newydd i gysgodi teithwyr
• Ailagor a defnyddio’r man rhwng platfformau 2 a 3 lle mae ‘platfform coll’
• Gosod cysgodfa ar blatfform 3
• Symud gwasanaethau trafnidiaeth gyhoeddus o blatfform 1 i blatfformau eraill. Felly mae’r holl weithrediadau trafnidiaeth ar blatfformau 2-3, gan adael platfform 1 at ddibenion gweithredol eraill (hynny yw, cynnal a chadw trenau a gwasanaethau cludo nwyddau)

 Integreiddio â dulliau eraill o deithio

• Darparu hwb cyfnewidfa drafnidiaeth bwrpasol i Gaergybi yng ngorsaf Caergybi
• Integreiddio tocynnau rhwng gwasanaethau trên, fferi a bysiau 
• Gwella’r integreiddio rhwng amseroedd y rheilffordd a’r porthladd er mwyn osgoi amseroedd cyrraedd a gadael sy’n gorgyffwrdd ac yn achosi oedi
• Cynnig mwy o drafnidiaeth gyhoeddus yn yr orsaf drwy wella’r integreiddio â gwasanaethau bysiau lleol
• Symud y safleoedd bysiau sydd ar Ffordd Fictoria ar hyn o bryd er mwyn lleihau’r pellter cerdded i fynedfa’r orsaf
• Sicrhau bod gwasanaethau trên ar gael mor aml ag yr oeddent cyn y pandemig
• Cynyddu amlder gwasanaethau trên i ganolfannau economaidd allweddol yng Nghymru a Lloegr

 Ymddygiad gwrthgymdeithasol

• Mae opsiwn cyffredinol hefyd sy’n canolbwyntio ar yr angen i fynd i’r afael ag ymddygiad gwrthgymdeithasol

Arddangosfa gyhoeddus

Cafodd digwyddiad cyhoeddus ei gynnal yn: Neuadd y Farchnad, Stryd Stanley, Caergybi LL65 1HH ar 24 Tachwedd 2022 rhwng 12pm ac 8pm.

Roedd croeso i aelodau’r cyhoedd ddod i weld cynigion y cynllun a siarad ag aelodau o dîm y prosiect.

Lleoliadau

Roedd gwybodaeth am y cynllun a ffurflenni adborth papur ar gael yn y lleoliadau isod:

• Gorsaf Caergybi (Ffordd Llundain, Caergybi L65 2NE)
• Llyfrgell Caergybi (Neuadd y Farchnad, Stryd Stanley, Caergybi, LL65 1HH)